स्मार्ट मीटर सक्तीविरोधात धाराशिव जिल्हा काँग्रेसचे आंदोलन; महावितरणला निवेदन

प्रतिनिधी : प्रतीक वाघे

धाराशिव : ग्राहकांच्या इच्छेविरुद्ध स्मार्ट मीटर बसविणे, स्मार्ट मीटरमुळे अवाजवी वीजबिले येत असल्याच्या तक्रारी आणि सर्वसामान्य ग्राहकांवर वाढणारा आर्थिक भार याच्या निषेधार्थ धाराशिव जिल्हा काँग्रेस कमिटीच्या वतीने स्मार्ट मीटर सक्तीविरोधात तीव्र आंदोलन करण्यात आले. यावेळी काँग्रेस भवन ते महाराष्ट्र राज्य वीज वितरण कंपनीच्या (महावितरण) कार्यालयापर्यंत निषेध रॅली काढण्यात आली. आंदोलनानंतर महावितरणच्या धाराशिव येथील कार्यकारी अभियंत्यांना विविध मागण्यांचे निवेदन देण्यात आले.

या आंदोलनात जिल्हाभरातील काँग्रेसचे पदाधिकारी, कार्यकर्ते, सहकारी तसेच नागरिक आणि वीज ग्राहक मोठ्या संख्येने सहभागी झाले होते. स्मार्ट मीटरच्या सक्तीच्या अंमलबजावणीविरोधात घोषणाबाजी करत आंदोलकांनी ग्राहकांच्या हक्कांचा प्रश्न उपस्थित केला.

महावितरणमार्फत राज्यभर स्मार्ट मीटर बसविण्याची मोहीम राबविण्यात येत आहे. मात्र, अनेक ठिकाणी ग्राहकांची स्पष्ट संमती न घेता त्यांच्या घरांमध्ये स्मार्ट मीटर बसविले जात असल्याच्या तक्रारी आहेत. त्यामुळे ग्राहकांमध्ये तीव्र नाराजी निर्माण झाली असून, स्मार्ट मीटरच्या प्रक्रियेत पारदर्शकता आणि ग्राहकांची संमती आवश्यक असल्याची भूमिका काँग्रेसने निवेदनातून मांडली.

स्मार्ट मीटरनंतर वाढलेल्या बिलांवर काँग्रेसचा आक्षेप

स्मार्ट मीटर बसविल्यानंतर अनेक ग्राहकांना पूर्वीच्या तुलनेत लक्षणीयरीत्या जास्त वीजबिले येत असल्याच्या तक्रारी सातत्याने प्राप्त होत असल्याचे निवेदनात नमूद करण्यात आले आहे. वीज वापरामध्ये कोणताही मोठा बदल नसतानाही बिलांमध्ये वाढ होत असल्याने गरीब, शेतकरी, कामगार, नोकरदार, ज्येष्ठ नागरिक, महिला, लघु व्यावसायिक आणि मध्यमवर्गीय कुटुंबांवर आर्थिक भार पडत असल्याचा दावा काँग्रेसने केला आहे.

स्मार्ट मीटरच्या रीडिंगमध्ये पारदर्शकता नसणे, बिलाची गणना कशी झाली याबाबत ग्राहकांना स्पष्ट माहिती न मिळणे आणि तक्रारींचे तातडीने निराकरण न होणे यामुळे नागरिकांमध्ये संभ्रम आणि अविश्वास निर्माण झाल्याचेही निवेदनात म्हटले आहे.

मुख्यमंत्र्यांच्या भूमिकेची अंमलबजावणी करण्याची मागणी

स्मार्ट मीटरच्या विषयावर महाराष्ट्र विधानसभेत चर्चा झाली असून, ग्राहकांची इच्छा नसताना त्यांच्या इच्छेविरुद्ध स्मार्ट मीटर बसवू नयेत, अशी भूमिका मुख्यमंत्र्यांनी व्यक्त केल्याचा उल्लेख काँग्रेसच्या निवेदनात करण्यात आला आहे. असे असतानाही काही भागात ग्राहकांच्या संमतीशिवाय स्मार्ट मीटर बसविण्याचे काम सुरू असल्याच्या तक्रारी येत असल्याने काँग्रेसने प्रशासनाच्या कार्यपद्धतीवर प्रश्नचिन्ह उपस्थित केले आहे.

काँग्रेसच्या प्रमुख मागण्या

– ग्राहकांच्या स्पष्ट संमतीशिवाय स्मार्ट मीटर बसविण्याची प्रक्रिया तात्काळ थांबवावी.
– धाराशिव जिल्ह्यात कोणतेही स्मार्ट मीटर सक्तीने बसवू नयेत.
– ग्राहकांच्या इच्छेविरुद्ध बसविण्यात आलेले स्मार्ट मीटर काढून पूर्वीचे मीटर पुन्हा बसवावे.
– स्मार्ट मीटर बसवल्यानंतर वाढलेल्या वीजबिलांची उच्चस्तरीय, स्वतंत्र आणि तांत्रिक चौकशी करावी.
– चुकीची अथवा अवाजवी वीजबिले रद्द करून ग्राहकांना फेरबिल देण्यात यावे.
– स्मार्ट मीटरमुळे ग्राहकांचे आर्थिक नुकसान झाले असल्यास त्याची भरपाई करण्याबाबत शासनाने निर्णय घ्यावा.
– चौकशी पूर्ण होईपर्यंत स्मार्ट मीटर योजनेची अंमलबजावणी स्थगित करावी.
– ग्राहकांच्या तक्रारींचे तातडीने निराकरण करण्यासाठी जिल्हास्तरीय विशेष तक्रार निवारण समिती स्थापन करावी.
– ग्राहकांच्या संमतीशिवाय स्मार्ट मीटर बसविले जाणार नाहीत, याबाबत स्पष्ट आदेश जारी करावेत.

निर्णय न झाल्यास तीव्र जनआंदोलनाचा इशारा

काँग्रेसच्या मागण्यांवर तातडीने सकारात्मक निर्णय न झाल्यास धाराशिव जिल्हा काँग्रेस कमिटीच्या वतीने लोकशाही मार्गाने तीव्र जनआंदोलन छेडण्यात येईल, असा इशारा निवेदनातून देण्यात आला आहे. पुढील आंदोलनातून निर्माण होणाऱ्या परिस्थितीची संपूर्ण जबाबदारी शासन आणि महावितरण प्रशासनाची राहील, असेही निवेदनात स्पष्ट करण्यात आले आहे.

स्मार्ट मीटरच्या माध्यमातून वीज वितरण व्यवस्थेत आधुनिक तंत्रज्ञान आणण्याच्या प्रक्रियेला ग्राहकांचा विरोध नसून, ग्राहकांची संमती, बिलिंगमधील पारदर्शकता आणि अवाजवी बिलांवरील तक्रारींचे निराकरण झाल्यानंतरच ही प्रक्रिया राबवावी, अशी काँग्रेसची भूमिका असल्याचे आंदोलनातून स्पष्ट करण्यात आले.