🚨धक्कादायक! तुळजापूर तालुक्यात 17 वर्षीय तरुणीवर लैंगिक अत्याचाराचा आरोप; भावाला जीवे मारण्याची धमकी देत अत्याचार केल्याची तक्रार, तरुणाविरोधात गुन्हा दाखल🚨

प्रतिनिधी : प्रतीक वाघे

तुळजापूर पोलीस ठाण्याच्या हद्दीत एका 17 वर्षीय तरुणीने दिलेल्या तक्रारीवरून एका तरुणाविरोधात लैंगिक अत्याचार, धमकी व दबाव टाकल्याप्रकरणी गुन्हा दाखल करण्यात आला आहे. या प्रकरणातील पीडित तरुणी व आरोपीची ओळख पोलिसांकडून गोपनीय ठेवण्यात आली आहे.

पोलिसांनी दिलेल्या माहितीनुसार, तक्रारदार तरुणीने आपल्या जबाबात आरोप केला आहे की, संबंधित तरुणाने तिच्या भावाच्या अंगावर टिप्पर घालून ठार मारण्याची धमकी दिली. या धमकीमुळे मानसिक दबाव निर्माण करून त्याने तिला इर्टिका कार व मोटरसायकलवरून विविध ठिकाणी नेले.

तक्रारीनुसार, संबंधित तरुणाने तिला लॉज तसेच डोंगर परिसरात नेऊन तिच्यावर लैंगिक अत्याचार केल्याचा आरोप करण्यात आला आहे. हा प्रकार दि. १९ जून २०२५ रोजी सकाळी ११ वाजल्यापासून ते दि. १५ मे २०२६ रोजी दुपारी ३.३० वाजेपर्यंतच्या कालावधीत घडल्याचे तक्रारीत नमूद करण्यात आले आहे.

या प्रकरणी पीडित तरुणीने दि. १८ जून २०२६ रोजी तुळजापूर पोलीस ठाण्यात तक्रार दाखल केली. तक्रारीच्या आधारे पोलिसांनी भारतीय न्याय संहिता (BNS) मधील कलम ६४(१), ७८, ३५१(३) तसेच पॉक्सो कायदा २०१२ अंतर्गत कलम ४, ८ व १२ अन्वये गुन्हा नोंद केला आहे.

दरम्यान, या प्रकरणाचा पुढील तपास तुळजापूर पोलीस करत असून, तक्रारीतील आरोपांची चौकशी सुरू आहे. तपासानंतर पुढील कायदेशीर कारवाई करण्यात येणार असल्याचे पोलिसांनी सांगितले.