📚 ‘माझा वाढदिवस, विद्यार्थ्यांच्या शिक्षणासाठी!’ आरुषचा कौतुकास्पद उपक्रम

प्रतिनिधी : प्रतीक वाघे

सांगवी मार्डी, तुळजापूर : वाढदिवस म्हटला की केक, उत्सव आणि आनंदाचा सोहळा असे चित्र पाहायला मिळते. मात्र, या पारंपरिक पद्धतीला फाटा देत तुळजापूर तालुक्यातील सांगवी मार्डी येथील पत्रकार रुपेश डोलारे यांचा मुलगा चि. आरुष डोलारे याचा वाढदिवस विद्यार्थ्यांना शैक्षणिक साहित्याचे वाटप करून अनोख्या पद्धतीने साजरा करण्यात आला.

सांगवी मार्डी येथील जिल्हा परिषद प्राथमिक शाळेत हा उपक्रम आयोजित करण्यात आला. आरुषच्या वाढदिवसानिमित्त शाळेतील विद्यार्थ्यांना विविध प्रकारचे शैक्षणिक साहित्य देण्यात आले. वाढदिवसाचा आनंद केवळ स्वतःपुरता मर्यादित न ठेवता विद्यार्थ्यांच्या शिक्षणाला हातभार लावण्याचा हा उपक्रम राबविण्यात आला.

‘वाढदिवसाचा आनंद सामाजिक बांधिलकीतूनही साजरा करता येतो’ हा प्रेरणादायी संदेश या उपक्रमातून देण्यात आला. शैक्षणिक साहित्य मिळाल्याने विद्यार्थ्यांमध्येही आनंदाचे वातावरण निर्माण झाले. या उपक्रमामुळे विद्यार्थ्यांना शिक्षणासाठी प्रोत्साहन मिळण्यास मदत होईल, अशी भावना उपस्थितांनी व्यक्त केली.

यावेळी मुख्याध्यापक माने मॅडम, कोळेकर सर, चव्हाण सर, गायकवाड सर तसेच अश्विनी डोलारे यांची उपस्थिती होती. वाढदिवसानिमित्त राबविण्यात आलेल्या या सामाजिक आणि शैक्षणिक उपक्रमाचे उपस्थितांकडून कौतुक करण्यात आले.

वाढदिवसाच्या निमित्ताने अनावश्यक खर्च करण्याऐवजी गरजू विद्यार्थ्यांना शैक्षणिक साहित्य देऊन त्यांच्या शिक्षणाला हातभार लावण्याचा आरुष डोलारे यांचा उपक्रम निश्चितच प्रेरणादायी ठरला आहे.