🔥 तुळजापुरात खोट्या सोन्याचा खेळ वृद्ध महिलेचे दागिने लुटणारा आरोपी जेरबंद; ४.६५ लाखांचा मुद्देमाल जप्त

प्रतिनिधी : प्रतीक वाघे

तुळजापूर तुळजाभवानी देवीच्या दर्शनासाठी तुळजापुरात आलेल्या वृद्ध महिलेची फसवणूक करून तिच्याकडील सोन्याचे दागिने लुटणाऱ्या आरोपीला धाराशिव स्थानिक गुन्हे शाखेच्या पथकाने शिताफीने जेरबंद केले आहे. आरोपीकडून चोरीस गेलेले सोन्याचे दागिने तसेच गुन्ह्यात वापरलेले मोटार वाहन असा एकूण ४ लाख ६५ हजार रुपये किमतीचा मुद्देमाल जप्त करण्यात आला आहे.

दि. १ सप्टेंबर २०२६ रोजी फिर्यादी निनाबाई चौगुले या तुळजाभवानी देवीच्या दर्शनासाठी तुळजापूर येथे आल्या होत्या. यावेळी काही इसमांनी त्यांना बोलण्यात गुंतवून खोटे सोन्याचे बिस्कीट खरे असल्याचे भासवले. त्यानंतर या बिस्किटाच्या बदल्यात त्यांच्या अंगावरील सोन्याचे दागिने घेऊन त्यांची फसवणूक करण्यात आली.

या प्रकरणी तुळजापूर पोलीस ठाण्यात गुन्हा रजि. क्र. ४३०/२०२६, कलम ३१८(४), ३(५) भारतीय न्याय संहिता अन्वये गुन्हा दाखल करण्यात आला होता.

गुन्ह्याचा तपास सुरू असताना स्थानिक गुन्हे शाखेला मिळालेल्या गोपनीय माहितीच्या आधारे पथकाने संशयित आरोपी ऋषीकेश बंडू जाधव (वय २५, रा. गांधी नगर, तेलगाव नाका, बीड) याच्यावर पाळत ठेवली. त्यानंतर त्याला शिताफीने ताब्यात घेऊन चौकशी केली असता त्याने गुन्ह्याची माहिती दिली. तसेच त्याच्या चौकशीत या गुन्ह्यात सहभागी असलेल्या अन्य साथीदारांची नावेही समोर आल्याची माहिती पोलिसांनी दिली.

पोलिसांनी आरोपीकडून चोरीस गेलेले सोन्याचे दागिने आणि गुन्ह्यात वापरलेले मोटार वाहन असा एकूण ₹४,६५,००० किमतीचा मुद्देमाल जप्त केला आहे. आरोपीची वैद्यकीय तपासणी करून पुढील कायदेशीर कारवाईसाठी त्याला तुळजापूर पोलीस ठाण्याच्या ताब्यात देण्यात आले आहे.

ही कारवाई पोलीस अधीक्षक रितु खोखर व अपर पोलीस अधीक्षक सचिन पांडकर यांच्या मार्गदर्शनाखाली करण्यात आली. पोलीस निरीक्षक विनोद इज्ज्पवार, सपोनि सुदर्शन कासार, पोहेकॉ शौकत पठाण, प्रकाश औताडे, जावेद काझी, फरहान पठाण, तसेच चापोह रत्नदीप डोंगरे, नागनाथ गुरव यांच्या पथकाने ही कारवाई यशस्वीरीत्या पार पाडली.

⚠️ भाविकांनी सावध राहण्याचे आवाहन

तुळजापूर हे देशभरातून भाविक येणारे धार्मिक तीर्थक्षेत्र असल्याने अशा प्रकारच्या फसवणुकीपासून भाविकांनी सावध राहणे गरजेचे आहे. अनोळखी व्यक्तीने सोन्याचे बिस्कीट, मौल्यवान वस्तू किंवा आकर्षक आमिष दाखविल्यास त्यावर विश्वास ठेवू नये, तसेच संशयास्पद व्यक्ती अथवा प्रकार आढळल्यास तातडीने पोलिसांशी संपर्क साधावा, असे आवाहन करण्यात येत आहे.