🚨 शेतकऱ्यांना तात्काळ मदत जाहीर करा; मनसेची मुख्यमंत्र्यांकडे मागणी

प्रतिनिधी : प्रतीक वाघे

धाराशिव : धाराशिव जिल्ह्यात पावसाने दडी मारल्याने सोयाबीन उत्पादक शेतकरी गंभीर आर्थिक संकटात सापडला आहे. या पार्श्वभूमीवर महाराष्ट्र नवनिर्माण सेनेच्या वतीने

जिल्हाधिकाऱ्यांमार्फत मुख्यमंत्री यांना निवेदन देऊन शेतकऱ्यांना तातडीने आर्थिक मदत जाहीर करण्याची मागणी करण्यात आली.
धाराशिव जिल्हा प्रामुख्याने खरीप पिकांवर अवलंबून असून, यंदाच्या खरीप हंगामात मोठ्या प्रमाणावर सोयाबीनची लागवड करण्यात आली आहे.

सोयाबीन हे जिल्ह्यातील प्रमुख नगदी पीक मानले जाते. मात्र, यावर्षी पावसाचे प्रमाण अत्यल्प राहिले असून, मागील महिनाभरापेक्षा अधिक काळ पावसात मोठा खंड पडल्याने शेतातील जमिनीतील ओलावा कमी झाला आहे.

सोयाबीनचे पीक फुले व शेंगा येण्याच्या महत्त्वाच्या अवस्थेत असतानाच पाण्याअभावी जागेवरच वाळत असल्याने शेतकऱ्यांच्या उत्पादनावर मोठा परिणाम होण्याची शक्यता आहे.

हातातोंडाशी आलेला घास निसर्गाने हिरावून घेतल्याने शेतकरी आर्थिक संकटात सापडला असून, शासनाने तातडीने मदतीचा हात द्यावा, अशी मागणी मनसेने केली आहे.

मनसेच्या प्रमुख मागण्या

🔹 सोयाबीन पिकाच्या नुकसानीचे तातडीने पंचनामे करण्यासाठी महसूल व कृषी विभागाच्या संयुक्त पथकांना आदेश द्यावेत.

🔹 धाराशिव जिल्ह्यात दुष्काळसदृश परिस्थिती जाहीर करून शेतकऱ्यांना हेक्टरी ५० हजार रुपयांची आर्थिक मदत द्यावी.

🔹 पीक विमा कंपन्यांना तातडीने सर्वेक्षण करण्याचे आदेश देऊन ७२ तासांच्या आत पात्र शेतकऱ्यांच्या खात्यावर विम्याची रक्कम जमा करण्याची कार्यवाही करावी.

🔹 शेतकऱ्यांचे खरीप हंगामातील कर्ज माफ करून रब्बी हंगामासाठी बिनव्याजी नवीन कर्ज उपलब्ध करून द्यावे.

शासनाने या गंभीर परिस्थितीची तातडीने दखल घेऊन शेतकऱ्यांना न्याय द्यावा. अन्यथा शेतकऱ्यांच्या हितासाठी महाराष्ट्र नवनिर्माण सेनेला तीव्र आंदोलनाचा पवित्रा घ्यावा लागेल, असा इशारा मनसेच्या पदाधिकाऱ्यांनी दिला.

यावेळी मनसे जिल्हाध्यक्ष महेश जाधव, तुळजापूर तालुकाध्यक्ष मलिकार्जुन कुंभार, तुळजापूर विधानसभा अध्यक्ष मयूर गाढवे, सोमेश्वर आलुरे आणि समीर शेख यांनी शासनाकडे तातडीने मदतीची मागणी केली.