🚨 गर्भवती झाल्यानंतर गर्भपातासाठी गोळ्या दिल्याचा आरोप; परंड्यात तरुणासह आई अडचणीत

प्रतिनिधी : प्रतीक वाघे

परंडा : परंडा पोलीस ठाण्याच्या हद्दीतील एका गावातील २१ वर्षीय तरुणीने दिलेल्या प्रथम खबरेवरून एका तरुणासह त्याच्या आईविरुद्ध गंभीर स्वरूपाचा गुन्हा दाखल करण्यात आला आहे. पीडितेची ओळख गोपनीय ठेवण्यात आली आहे.

पोलिसांकडे दाखल करण्यात आलेल्या तक्रारीनुसार, दि. १ एप्रिल २०२३ ते दि. १९ सप्टेंबर २०२६ या कालावधीत गावातील एका तरुणाने संबंधित तरुणीशी लग्न करण्याचे आश्वासन दिल्याचे नमूद करण्यात आले आहे. या आश्वासनाच्या आधारे तिच्या राहत्या घरी तिच्यावर लैंगिक अत्याचार केल्याचा आरोप पीडितेने तक्रारीत केला आहे.

या घटनेनंतर संबंधित तरुणी गर्भवती राहिल्याचेही तक्रारीत नमूद करण्यात आले आहे. त्यानंतर सध्या बाळ नको असल्याचे सांगून संबंधित तरुणाने आणि त्याच्या आईने गर्भपात होण्यासाठी गोळ्या खाण्यास दिल्याचा आरोप पीडितेने केला आहे. या गोळ्या घेतल्यानंतर गर्भपात झाल्याचेही तक्रारीत नमूद आहे.

या प्रकरणी पीडितेने दि. २६ सप्टेंबर २०२६ रोजी परंडा पोलीस ठाण्यात प्रथम खबर दिली. त्यावरून पोलिसांनी भारतीय न्याय संहिता (BNS) कलम ६९, ८८ आणि ४९ अन्वये गुन्हा नोंदविला आहे.

प्रकरणाची पुढील चौकशी परंडा पोलीस करीत असून, तक्रारीतील आरोपांची सत्यता, संबंधित व्यक्तींची भूमिका आणि घटनेशी संबंधित इतर बाबी तपासानंतर स्पष्ट होणार आहेत.

पीडितेची ओळख कायदेशीर कारणास्तव जाहीर करण्यात आलेली नाही.