🚨 परंड्यात मोटारसायकल अडवून लुटमार करणाऱ्या टोळीचा पर्दाफाश स्थानिक गुन्हे शाखेची धडाकेबाज कारवाई मुख्य संशयित आरोपी ताब्यात, ₹73 हजारांचा मुद्देमाल जप्त जबरी चोरीचे 2 गुन्हे उघडकीस

प्रतिनिधी प्रतीक वाघे

परंडा : मोटारसायकलस्वारांना अडवून मारहाण करत रोख रक्कम, मोबाईल आणि सोन्याचे दागिने लुटणाऱ्या टोळीचा स्थानिक गुन्हे शाखेने पर्दाफाश केला आहे. या कारवाईत एका संशयित आरोपीला ताब्यात घेण्यात आले असून, त्याच्याकडून सोन्याचे दागिने, मोबाईल आणि गुन्ह्यात वापरलेली मोटारसायकल असा एकूण ₹73 हजारांचा मुद्देमाल जप्त करण्यात आला आहे. या कारवाईमुळे परंडा पोलीस ठाण्याच्या हद्दीतील जबरी चोरीचे दोन गुन्हे उघडकीस आले आहेत.

दि. 17 ऑगस्ट 2026 रोजी स्थानिक गुन्हे शाखेचे पथक परंडा पोलीस ठाण्यात दाखल असलेल्या गुन्ह्याचा तपास करत आरोपी व चोरीस गेलेल्या मुद्देमालाचा शोध घेण्यासाठी पेट्रोलिंग करीत होते. यावेळी तांत्रिक विश्लेषण आणि गोपनीय बातमीदारामार्फत मिळालेल्या माहितीनुसार, मोहा येथील अनिल भिमा पवार याने आपल्या साथीदारांसह हा गुन्हा केल्याची माहिती पोलिसांना मिळाली. तो सध्या येरमाळा परिसरात असल्याचे समजताच पोलिसांनी त्याच्या हालचालींवर लक्ष ठेवले.

पोलिसांनी सापळा रचला असता अनिल पवार हा येडेश्वरी मंदिराकडून मलकापूर पाटीकडे मोटारसायकलवरून जाताना आढळून आला. पोलिसांनी त्याला थांबण्याचा इशारा केला; मात्र त्याने तेथून निघून जाण्याचा प्रयत्न केला. पोलिसांनी त्याचा शिताफीने पाठलाग करून त्याला ताब्यात घेतले.

चौकशीदरम्यान सुरुवातीला त्याने उडवाउडवीची उत्तरे दिली. मात्र पोलिसांनी अधिक विश्वासात घेऊन कसून चौकशी केल्यानंतर त्याने आपल्या इतर तीन साथीदारांसह परंडा हद्दीत लुटमारीचे गुन्हे केल्याची माहिती दिल्याचे पोलिसांनी सांगितले.

दोन लुटमारीच्या घटनांची कबुली

आरोपीने दिलेल्या माहितीनुसार, मागील महिन्यात दुधी शिवारात मोटारसायकलवरून जाणाऱ्या एका पुरुष आणि महिलेला अडवून मारहाण करण्यात आली होती. त्यांच्याकडील रोख रक्कम, मोबाईल फोन आणि सोन्याचे दागिने जबरदस्तीने घेऊन आरोपी पसार झाले होते.

तसेच, त्यापूर्वी सुमारे तीन महिन्यांपूर्वी सोनगिरी शिवारात शेतात जात असलेल्या एका महिलेला अडवून तिच्यावर मारहाण करून तिच्या गळ्यातील सोन्याचे दागिने लुटल्याची माहितीही आरोपीने दिल्याचे पोलिसांनी सांगितले.

चोरीच्या मुद्देमालाबाबत चौकशी केली असता, आपल्या वाट्याला आलेले सोन्याचे दागिने आणि मोबाईल फोन मोहा येथील राहत्या घरात ठेवले असल्याचे आरोपीने सांगितले. त्यानंतर पोलिस पथकाने मोहा येथे जाऊन कारवाई करत सोन्याचे दागिने, मोबाईल फोन आणि गुन्ह्यात वापरलेली मोटारसायकल असा एकूण ₹73,000 किमतीचा मुद्देमाल जप्त केला.

या कारवाईमुळे परंडा पोलीस ठाण्यातील जबरी चोरीचे दोन गुन्हे उघडकीस आले असून, आरोपीच्या इतर साथीदारांचा शोध सुरू आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस अधीक्षक श्रीमती रितू खोखर आणि अपर पोलीस अधीक्षक श्री. सचिन पांडकर यांच्या मार्गदर्शनाखाली करण्यात आली.

स्थानिक गुन्हे शाखेचे पोलीस निरीक्षक श्री. विनोद इज्जपवार, सहायक पोलीस निरीक्षक श्री. सचिन खटके, पोलीस हवालदार विनोद जानराव, नितीन जाधवर, पोलीस नाईक बबन जाधवर, पुष्कर मुंगळे, चालक पोलीस हवालदार महेबुब अरब, तसेच सुभाष चौरे, प्रकाश बोईनवाड, रणनवरे आणि आरसीपी पथकातील अंमलदार यांच्या पथकाने ही यशस्वी कारवाई केली.

परंडा परिसरात मोटारसायकलस्वारांना अडवून लुटमारीच्या घटना घडत असल्याने नागरिकांमध्ये चिंता निर्माण झाली होती. स्थानिक गुन्हे शाखेच्या या कारवाईमुळे अशा प्रकारच्या गुन्ह्यांना आळा बसण्यास मदत होणार असून, टोळीतील उर्वरित आरोपींवरही कारवाई होण्याची शक्यता आहे.