🚨धाराशिव सायबर पोलिसांची मोठी कारवाई फसवणुकीच्या पैशातून खरेदी केलेल्या सोन्याच्या कॉईनची ऑर्डर केली रद्द, ६४ हजार २३२ रुपये तक्रारदाराला परत🚨

प्रतिनिधी : प्रतिक वाघे

धाराशिव :
ऑनलाईन आर्थिक फसवणुकीच्या प्रकरणात धाराशिव सायबर पोलिसांनी तातडीने कारवाई करत सायबर गुन्हेगाराच्या ताब्यात जाणारी ६४ हजार २३२ रुपयांची रक्कम परत मिळवून दिली आहे. फसवणुकीच्या पैशातून आरोपीने खरेदी केलेल्या सोन्याच्या कॉईनची ऑर्डर रद्द करून तक्रारदाराला संपूर्ण रक्कम रिफंड करण्यात सायबर पोलिसांना यश आले आहे.

वाशी तालुक्यातील अनिकेत बापू सरवदे (वय २८, व्यवसाय नोकरी) यांना दि. १५ जून २०२६ रोजी एका अनोळखी व्यक्तीचा फोन आला. संबंधित व्यक्तीने स्वतःला ॲक्सिस बँकेचा अधिकारी असल्याचे सांगून क्रेडिट कार्डची लिमिट वाढवणे व कार्ड ॲक्टिव्ह करण्याच्या नावाखाली मोबाईलवर लिंक पाठवली.

फिर्यादींना सदर लिंक ओपन करून क्रेडिट कार्डची माहिती भरण्यास सांगण्यात आले. त्यानंतर मोबाईलवर आलेला ओटीपी घेतल्यानंतर त्यांच्या क्रेडिट कार्डमधून ६४ हजार २३२ रुपयांची रक्कम काढण्यात आली.

फसवणूक झाल्याचे लक्षात येताच अनिकेत सरवदे यांनी तात्काळ सायबर हेल्पलाईन क्रमांक १९३० वर संपर्क साधून सायबर पोलीस ठाणे, धाराशिव येथे माहिती दिली. तसेच एनसीसीआर पोर्टलवर तक्रार क्रमांक ३१९०६२६०१२९३६९ अन्वये तक्रार नोंदविण्यात आली.

तक्रारीनंतर धाराशिव सायबर पोलिसांनी तांत्रिक तपास सुरू केला असता फसवणुकीची रक्कम रेजर पे पेमेंट गेटवेद्वारे ब्लूस्टोन ज्वेलर्स कंपनीकडे वर्ग झाल्याचे निष्पन्न झाले. पोलिसांनी तातडीने संबंधित कंपनीच्या नोडल अधिकाऱ्यांशी ई-मेल व फोनद्वारे संपर्क साधला.

तपासात आरोपीने या फसवणुकीच्या रकमेतून ब्लूस्टोन ज्वेलर्सकडून ऑनलाईन सोन्याचा कॉईन खरेदी केल्याचे समोर आले. त्यानंतर सायबर पोलिसांनी कंपनीशी समन्वय साधून सोन्याच्या कॉईनची ऑर्डर रद्द केली आणि फिर्यादींची ६४ हजार २३२ रुपयांची संपूर्ण रक्कम परत मिळवून दिली.

ही कारवाई पोलीस अधीक्षक रितू खोखर मॅडम, अपर पोलीस अधीक्षक पांडकर साहेब यांच्या मार्गदर्शनाखाली पोलीस निरीक्षक यादव, सहाय्यक पोलीस निरीक्षक कासुळे, पोलीस उपनिरीक्षक सर्जे तसेच सायबर पोलीस पथकातील मपोना ५३/पीळ, पोलीस शिपाई ६४०/सूर्यवंशी, मपोशि १६६९/खांडेकर, पोशि १२६/पुरी, पोशि १८९४/अंगुले व पोशि १६५/बिराजदार यांनी केली.

सायबर पोलिसांचे नागरिकांना आवाहन :
अनोळखी मोबाईल क्रमांकावरून आलेले फोन, मेसेज, लिंक किंवा क्यूआर कोडवर विश्वास ठेवू नका. बँक खाते, क्रेडिट कार्ड, एटीएम किंवा ओटीपीची माहिती कोणालाही देऊ नये.

सायबर फसवणूक झाल्यास नागरिकांनी विलंब न करता २४ तासांच्या आत हेल्पलाईन क्रमांक १९३० वर संपर्क साधावा किंवा  वर तक्रार नोंदवावी.